Artisti Brilant Milazimi do ta përfaqësojë Kosovën në Bienalen e Artit në Venecia 2026

Kosova do të përfaqësohet në edicionin e ardhshëm të Bienales së Artit në Venecia 2026 nga artisti i ri nga Gjilani, Brilant Milazimi, me projektin e tij të titulluar “Dhëmbë të fortë”.

“Ky projekt artistik paraqet një qasje të thellë dhe reflektuese ndaj realiteteve politike dhe sociale, duke përdorur gjuhën e pikturës për të trajtuar temat e tensionit, qëndrueshmërisë dhe rezistencës. Me një stil të veçantë vizual dhe një ndjeshmëri të thellë ndaj kontekstit bashkëkohor, Milazimi e vendos artin si mjet të fuqishëm të komunikimit dhe ndërgjegjësimit”, thotë Din Azizi, përgjegjës i Galerisë së Arteve në Gjilan, transmeton 2LONLINE.com.

Pavijoni i Kosovës do të jetë nën kurimin e José Esparza Chong Cuy, një figurë e njohur në fushën e artit bashkëkohor ndërkombëtar, duke garantuar një prezantim profesional dhe dinjitoz të vendit tonë në një nga ngjarjet më prestigjioze të artit global.

“Galeria e Arteve – Gjilan, si institucion kulturor, e përgëzon Brilantin për këtë arritje dhe i uron suksese në përfaqësimin e Kosovës me dinjitet dhe krenari në Bienalen e Venecias. Ky përfaqësim është një dëshmi e fuqisë krijuese që po lind në qytetet tona dhe një hap i rëndësishëm për afirmimin e artistëve të rinj nga Kosova në skenën ndërkombëtare të artit bashkëkohor”, thotë përgjegjësi i Galerisë së Arteve në Gjilan, Din Azizi. /2LONLINE/