Arrestohet Senad Ramaj, u .d i kryeshefit ekzekutiv në EcoHigjiena

/2L ONLINE/ – Është arrestuar dhe i është caktuar masa e ndalimit për 48 orë, Senad Ramaj, u.d kryeshef ekzekutiv në Kompaninë EcoHigjiena në Gjilan. Burimet e Portalit 2LONLINE, mësojnë se Ramaj pasi është arrestuar dhe intervistuar në polici, me urdhër të prokurorit të shtetit iu është caktuar masa e ndalimit për 48 orë.

Në ndërkohë, zëdhënësi i Policisë së Kosovës (PK), në Drejtorinë Rajonale në Gjilan Ismet Hashani ka bërë të ditur për Portalin 2LONLINE, se sot, pas një hetimi disa mujor, njësiti i krimeve ekonomike dhe antikorrupsion nga shtabi qendror që veprojnë në Gjilan, me urdhër të prokurorit të shtetit, kanë arrestuar, një të dyshuar shqiptar shtetas i Kosovës, me dyshimin e veprës penale, keqpërdorim i pozitës apo autoritetit zyrtar neni 422 i Kodit Penal të Republikës ës Kosovës.

“Dyshohet se i arrestuari ka lejuar në mënyrë të kundërligjshme të shiten pajisjet e Kompanisë Ecohigjiena, në një vlerë të konsiderueshme që besohet të ketë dëmtuar buxhetin e kompanisë”, ka thënë Hashani

Përndryshe, ai nuk ka bërë të ditur identitetin e të arrestuarit, por vetëm ka thënë se i dyshuari besohet se është përfaqësues i Moser Group, që është në partneritet me komunë, në Kompaninë Ecohigjiena, dhe i dyshuari pas intervistimit në prezencë të avokatit mbrojtës, me urdhër të prokurorit të shtetit ndalet për 48 orë. Burimet e 2L ONLINE, mësojnë se i ndaluar është pikërisht Senad Ramaj aktualisht u.d kryeshef ekzekutiv në EcoHigjienë.

Përndryshe, zëdhënësi Hashani ka thënë se lidhje me rastin janë duke u zhvilluar hetimet e mëtutjeshme. /2L ONLINE/