Arrestohet një person i dyshuar nën dyshimin e kryerjes së veprës penale “Dhënia ose Marrja e Ryshfetit në Lidhje me Votimin”

Policia e Kosovës, më datë 04.06.2026, rreth orës 19:30, ka pranuar një informatë e cila ndërlidhet me dyshimin se një person është përfshirë në kryerjen e veprës penale “Dhënia ose Marrja e Ryshfetit në Lidhje me Votimin”.

Bazuar në hetimet zyrtare, dyshohet se i dyshuari, mashkull kosovar i nacionalitetit serb, ka ftuar qytetarë që të paraqiten në një lokal në fshatin Uglarë – Graçanicë, për t’i udhëzuar se si të votojnë subjektin dhe kandidatët politikë të Listës Srpska, ku në këmbim të votës dyshohet se atyre u është premtuar se do të përfitojnë pensione sociale nga shteti i Serbisë.

Njësitë relevante policore, në lidhje me rastin, kanë kryer kontroll në lokalin dhe në shtëpinë e të dyshuarit, ku janë sekuestruar dëshmi që lidhen me dyshimet për kryerjen e veprës penale.

Është arrestuar personi i dyshuar, i cili, me vendim të prokurorit, është dërguar në mbajtje për dyzet e tetë (48) orë.

Policia e Kosovës mbetet e përkushtuar në realizimin e detyrave dhe përgjegjësive të saj ligjore në mënyrë profesionale karshi qytetarëve dhe vendit, si dhe të jetë transparente mbi punën dhe angazhimet e saj policore.

Si zakonisht, inkurajojmë të gjithë qytetarët që të mos bien pre e manipulimeve dhe të bashkëpunojnë me Policinë e Kosovës dhe institucionet kompetente, njëherit të raportojnë për çdo rast të kundërligjshëm që ndërlidhet me sigurinë dhe procesin zgjedhor, apo edhe jashtë tyre. /2LONLINE/