Arbër Ismajli viziton OVL të UÇK-së, Shoqatën e Familjeve të Dëshmorëve dhe Shoqatën e Invalidëve të Luftës së UÇK-së

Arbër Ismajli, nënkryetari i Lidhjes Demokratike të Kosovës (LDK), Dega në Gjilan, njëherësh kandidat i këtij subjekti për kryetar komune, në zgjedhjet e 12 tetorit, ka bërë me dije se ka zhvilluar një takim shumë të rëndësishëm me Organizatën e Veteranëve të UÇK-së, dega në Gjilan, në krye me Xhevdet Mehmetin dhe sekretarin Agim Mehmeti.

Gjithashtu, ai tha se u takua edhe me Shoqatën e Familjeve të Dëshmorëve, dega në Gjilan, të udhëhequr nga kryetari Rashit Ymeri, si dhe me Shoqatën e Invalidëve të Luftës së UÇK-së, dega në Gjilan, me kryetarin Selver Kqiku.

“Diskutuam mbi gjendjen e vështirë të këtyre kategorive shumë të ndjeshme të shoqërisë, për plagët e tyre që ende nuk shërohen, dhe respektin që duhet të kemi për veteranët e për obligimin tonë që kjo sakrificë të mos harrohet kurrë”, ka thënë Ismajli.

Ai shtoi se si qeverisje e ardhshme, këto kategori do të kenë trajtim të veçantë në secilin proces.

Ismajli tha se kontributi dhe sakrifica e tyre nuk guxon të harrohet, “prandaj kryetarët e këtyre shoqatave do t’i fusim nën ombrellën tonë, duke i përfshirë ngushtë në vendimmarrje dhe duke i bërë pjesë aktive të zhvillimit të Gjilanit”.

“Ju falënderoj nga zemra dhe jam shumë mirënjohës për mikpritjen e ngrohtë. Faleminderit për sakrificën, kujtimin dhe kontributin tuaj që keni dhënë për lirinë tonë.  Republika jonë është simbol i gjakut dhe i rezistencës suaj”, ka thënë Arbër Ismajli, i cili në zgjedhjet e 12 tetorit, synon postin e të parit të komunës duke qenë kandidat i LDK-së për kryetar komune.  /2LONLINE/