Arbër Ismajli dhe Riad Rashiti takojnë banorët e Malishevës

Ditë më parë LDK e PDK arritën marrëveshje për garën e balotazhit në Gjilan, e sonte, Arbër Ismajli i LDK-së, që do të kërkojë postin e kryetarit në garën e balotazhit të 9 nëntorit dhe kryetari i Degës së PDK-së, së Gjilanit, Riad Rashiti, bashkë, takuan qytetarët e Malishevës.

“Sonte, së bashku me kryetarin e PDK-së, Riad Rashiti, pata nderin të takoj banorët e Malisheves së Heroit të Kombit Abdullah Tahiri, një pjesë e Gjilanit që gjithmonë ka dhuruar intelektualë, funksionarë dhe njerëz të jashtëzakonshëm për zhvillimin e shoqërisë dhe të cilët janë bashkuar në vizionin tonë për ndryshimin përfundimtar të mentalitetit të një qeverisje e cila ka dëshmuar që nuk është e interesuar aspak për zhvillimin e Gjilanit”, ka thënë me këtë rast Arbër Ismajli.

Ai shtoi se: “Bisedat dhe vullneti i tyre na japin motivim të madh për të sjellë ndryshimin që Gjilani i ri e meriton”.

”Me zemër dhe angazhim, po përgatitemi për 9 nëntorin, ditën kur së bashku do të fillojmë ndërtimin e një të ardhme shumë të mirë për qytetin dhe qytetarët tanë”, ka thënë Arbër Ismajli i LDk-së.  /2LONLINE/