Ansambli “Gjilani” mirëpret delegacion nga Bursa, theksohet bashkëpunimi kulturor

Ansambli i Këngëve dhe Valleve “Gjilani” ka mirëpritur sot në ambientet e tij një delegacion nga Bursa e Turqisë, në kuadër të një vizite që synon forcimin e bashkëpunimit kulturor ndërmjet dy vendeve.

Afrim Haziri, drejtor i Ansamblit tha se mysafirët nga Bursa, të cilët paraprakisht zhvilluan edhe një takim me kryetarin e Komunës së Gjilanit, Alban Hysenin, u njohën nga afër me aktivitetet artistike të ansamblit, si dhe me përkushtimin e tij në ruajtjen dhe promovimin e trashëgimisë kulturore.

Në përbërje të delegacionit ishin Hüseyin Özkan, kryetar i Komisionit për Ballkan në qytetin e Bursës, Nesrin Çakıroğlu Aksit, kryetare e shoqatës “Bursa Olympus”, si dhe znj. Gülçin, anëtare e komisionit në “Bursa Olympus”.

Po ashtu, sipas drejtorit të Ansamblit “Gjilani”, Afrim Hazirit, në këtë takim u theksua rëndësia e bashkëpunimit në fushën e kulturës dhe krijimi i urave të reja ndërmjet institucioneve dhe organizatave kulturore.

Përfaqësuesit e ansamblit shprehën mirënjohje për vizitën dhe mbështetjen e vazhdueshme nga partnerët turq, duke vlerësuar veçanërisht bashkëpunimin e deritanishëm me Hüseyin Özkan.

“Nga kjo vizitë pritet që në të ardhmen të konkretizohen projekte të reja dhe bashkëpunime të përbashkëta në promovimin e kulturës”, ka thënë Haziri.  /2LONLINE/