Andin Hoti: Ministria do të adresojë sfidat e veteranëve, invalidëve të luftës dhe familjeve të dëshmorëve

Ministri në detyrë i Ministrisë për Punë, Familje dhe Vlerat e Luftës Çlirimtare, Andin Hoti, ka zhvilluar sot një takim me përfaqësues të organizatave të dala nga lufta në Gjilan, ku u diskutua për sfidat, nevojat dhe pritjet e veteranëve, invalidëve të luftës dhe familjeve të dëshmorëve.

Në takim morën pjesë kryetari i OVL-UÇK-së, Dega në Gjilan, Xhevdet Mehmeti, kryetari i Shoqatës së Familjeve të Dëshmorëve, Dega në Gjilan, Rashit Ymeri, si dhe përfaqësuesi i Shoqatës së Invalidëve të Luftës, Selver Kqiku.

Hoti tha se krijimi i Ministrisë për Punë, Familje dhe Vlerat e Luftës Çlirimtare përbën një hap të rëndësishëm institucional në trajtimin e çështjeve që prekin kategoritë e dala nga lufta.

“Për herë të parë është krijuar Ministria për Punë, Familje dhe Vlerat e Luftës Çlirimtare. Kjo ministri do të adresojë sfidat me të cilat këto kategori janë përballur ndër vite dhe do të punojë për avancimin e të drejtave, mirëqenies dhe dinjitetit të tyre”, deklaroi Hoti, transmeton 2LONLINE.

Ai theksoi se veteranët, invalidët e luftës dhe familjet e dëshmorëve kanë dhënë një kontribut të jashtëzakonshëm për lirinë dhe shtetndërtimin e Kosovës, duke shtuar se përkujdesja ndaj tyre mbetet përgjegjësi e institucioneve shtetërore.

Sipas tij, Lufta Çlirimtare e Kosovës mbetet themeli i lirisë së vendit, ndërsa mbështetja për të gjitha kategoritë e dala nga lufta është një obligim institucional dhe detyrim moral i shtetit.

Në përfundim të takimit, ministri në detyrë u nderua nga kryetari i OVL-UÇK-së në Gjilan, Xhevdet Mehmeti, i cili i dhuroi Hyjneshën në Fron, simbol të qytetërimit dhe identitetit të lashtë të Kosovës, si dhe Flamurin e Ushtrisë Çlirimtare të Kosovës, simbol të sakrificës, qëndresës dhe lirisë.  /2LONLINE/