Ambasadorja Jacobson premton mbështetje për Kosovën
Ministri i Punëve të Jashtme i Kosovës, Enver Hoxhaj, ka pritur të premten në takim Ambasadoren e Shteteve të Bashkuara të Amerikës në Republikën e Kosovës, Tracey Ann Jacobson.
Gjatë takimit, ministri Hoxhaj e falënderoi ambasadoren amerikane për mbështetjen e parezervë dhënë Kosovës në rrafshin dypalësh dhe shumëpalësh.
Ministri Hoxhaj dhe ambasadorja Jacobson biseduan për agjendën e bashkëpunimit ndërmjet Uashingtonit dhe Prishtinës, fuqizimin e partneritetit me Iowa-n dhe ngritjen e prezencës së Kosovës në SHBA.
Ministri Hoxhaj e njoftoi ambasadoren amerikane edhe për masat që Kosova ka ndërmarrë në raport me sanksionet ndaj Federatës Ruse, duke theksuar përkushtimin e Kosovës në raport me përgjegjësitë ndërkombëtare. Po ashtu, Hoxhaj, çmoi vlerësimin e Departamentit të Shtetit për përfshirjen e Kosovës në Koalicionin Ndërkombëtar kundër ISIS-it.
Ambasadorja Jacobson, vlerësoi progresin në Kosovë, duke shprehur mbështetjen e mëtutjeshme të SHBA-së për proceset në Kosovë.
Gjatë takimit, ministri Enver Hoxhaj po ashtu vlerësoi lartë bashkëpunimin bilateral ndërmjet SHBA-ve dhe Kosovës, duke theksuar vullnetin e Qeverisë së Kosovës për fuqizimin e gjithanshëm të raporteve dhe shkëmbimeve me SHBA-të, si partneri kryesor strategjik i Republikës së Kosovës.