Ambasada e SHBA-ve përshëndet votimin e Gjykatës

Ambasada e SHBA-ve në Kosovë e ka përshëndetur votimin pro për themelimin e Gjykatës speciale nga Parlamentit të Kosovës, duke e vlerësuar lart përkushtimin e deputetëve. Sipas SHBA-ve votimi i sotëm shtron rrugën për një proces të cilin bashkësia ndërkombëtare do ta shohë si kredibil, dhe që do të ndihmojë në mbylljen e këtij kapitulli të vështirë të historisë së Kosovës.

“Votimi i sotëm i Kuvendit të Kosovës ishte një hap vital drejt themelimit të një gjykate të Kosovës që mund të zgjidhë në mënyrë kredibile pohimet serioze nga Raporti i vitit 2010 i Këshillit të Evropës. Kjo gjykatë është thelbësore për të hequr akuzat nga të pafajshmit, për të dëshmuar përkushtimin e Kosovës ndaj sundimit të ligjit, dhe për të zgjidhur përfundimisht këto pohime shqetësuese. Ne vlerësojmë vendimin e atyre deputetëve të cilët vërtetuan përkushtimin e tyre për themelimin e një gjykate sipas ligjit të Kosovës dhe e cila do të përqëndrohet strikt në individët dhe në veprimet individuale. Votimi i sotëm shtron rrugën për një proces të cilin bashkësia ndërkombëtare do ta shohë si kredibil, dhe që do të ndihmojë në mbylljen e këtij kapitulli të vështirë të historisë së Kosovës. Shtetet e Bashkuara mbesin të përkushtuara për të mbështetur Kosovën gjersa Kosova vazhdon të ec para me këtë detyrë thelbësore”, thuhet në një deklaratë për media të lëshuar nga ambasada e SHBA-ve në Kosovë.

Jacobson: Themelimi i Gjykatës, lajm i mirë për Kosovën

Ambasadorja e Shteteve të Bashkuara në Kosovë, Tracey an Jacobson, e ka cilësuar si lajm të mirë për Kosovën, miratimin e themelimit të Gjykatës së posaçme për krimet e luftës dhe vazhdimin e mandatit të misionit evropian për sundimin e ligjit, EULEX.

Këto komente ambasadorja i ka bërë në rrjetin social Twitter.

Kuvendi i Kosovës ka miratuar themelimin e Gjykatës dhe zgjatjen e mandatit të EULEX-it me 89 vota për, 22 kundër dhe 2 abstenime, përmes miratimit të projektligjit për ratifikimin e marrëveshjes ndërkombëtare ndërmjet Kosovës dhe Bashkimit Evropian.