Aliu: Listën e investime kapitale do të hartojmë bashkërisht me qytetarët tanë

/2L ONLINE/ – Banorët e fshatrave Sodovinë e Jerlive dhe Sodovnë e Qerkezve kanë paraqitur dje para përfaqësuesve të Institucioneve Komunale të Vitisë nevojat e fshatit të tyre për investime kapitale dhe atë në kuadër të diskutimeve publike që komuna është duke i mbajtur me banorët e lokaliteteve të ndryshme për planifikimin e buxhetit komunal për vitet 2016-2018.

Zv. Kryetari i Komunës së Vitisë, Hasan Aliu duke folur gjatë këtyre diskutimeve publike me banorët e këtyre lokaliteteve u shpreh se kjo komunë është e interesuar që qytetarët të jen pjesë e hartimit të buxhetit komunal, konkretisht të listës për investime kapitale duke potencuar se këto takime kanë edhe një qëllim tjetër.

“Qëllimi kryesor pse po i mbajmë këto takime është që mjetet qe do t i kemi për investime kapitale në vitin në vijim të shpërndajmë në mënyrë të drejtë me nevojat e banorëve të komunës sonë. Natyrisht sot jemi këtu që të dëgjojmë edhe shqetësimit e mundshme të qytetarëve dhe të bëjmë zgjidhje në interesin tonë të përbashkët “ u shpreh Aliu.

Ai po ashtu theksoi se Komuna e Vitisë po shikon që sa më parë të përfundoj projektet në fushën e infrastrukturës, ujësjellësve dhe kanalizimit me qëllim që në të ardhmen të investoj në projektet e tjera por paraqiti disa pengesa për shkak të borxheve nga qeveria e kaluar në fushën e rregullimit të ujësjellësve.

“Nuk dua të akuzoj qeverinë e kaluar por është fakt se kemi trashëguar borxhe të cilat na kanë penguar në realizimin e projekteve të tjera në fushën e ujësjellësit sepse vitin kaluar kemi paguar 30 mijë euro borxhe ndërkaq gjatë këtij viti na është paraqitur një borxh prej 170 mijë euro “ u shpreh Aliu.

Ai vuri re se Komuna e Vitisë është e interesuar të bëjë çbllokimin e projekteve në fushën e ujësjellësit duke potencuar se ata janë duke diskutuar me organizatat financuesve që borxhet të paguan me këste dhe të vazhdohet me projekte në fushën e sigurimit të ujit të pijes për banorët e kësaj komune.

Ndërkaq për ecurinë e buxhetit komunal ka folur Berat Zuka, zyrtarë pranë Drejtorisë për Ekonomi, Financa dhe Zhvillim i cili paraqiti ndarjen e buxhetit komunal në kategoritë e ndryshme por njoftoj banorët edhe lidhur me kërkesën e përfaqësuesve të komunës për rritjen e buxhetit komunal konkretisht në investimet kapitale.

Banorët e fshatit Sodovinë e Qerkezve gjatë diskutimit publik kanë paraqitur disa nevoja për investime kapitale si ndërtimi i një trotuari me ndriçim publik, vendosjen e rrethojave të shkollës, zgjedhja e problemit me ujë të pijshëm, rregullimi i disa rrugëve fushore por edhe asfaltimi i rrugëve të lagjeve, hapja e një rruge alternative si dhe disa kërkesa të tjera.

Ndërkaq banorët e fshatit Sodovinë e Jerlive të cilët ju janë përgjigjur në numër më të madh këtij takimi paraqitën kërkesa të shumta ndër to ishin: rregullimi i trotuarit përgjatë rrugës Viti-Gërlicë dhe prej shkollës fillore të këtij fshati deri të lagjja “ Misini” , përfundimin e rrjetit të kanalizimit në gjithë fshatin, asfaltimi i rrugëve të lagjes dhe rregullimi me zhavorr të rrugëve fushore, hapja e puseve për kompleksin “Gursel dhe Bajram Sylejmani” dhe të Ambulatës së fshatit si dhe disa kërkesa të tjera. Në këtë takim të pranishëm ishin edhe disa nga Drejtorët e drejtorive si dhe këshilltarë të Kuvendit Komunal të Vitisë. /2L ONLINE/