Alarm për prindër: Regjistrohen 46 raste kur të miturit bien në konflikt me ligjin

/2L ONLINE/ – Konflikti me ligjin i të miturve dhe dhuna në familje janë dy nga shqetësimet që i karakterizojnë këto katër muaj a më tepër, të këtij viti, me të cilat po merret Qendra për Punë Sociale në Gjilan, shërbimet përkatëse. Që nga 1 janari e deri më sot, në statistikat e Qendrës për Punë Sociale në Gjilan janë regjistruar 46 raste kur të miturit kanë ra në konflikt me ligjin.

Mursel Zymberi, drejtor i Qendrës për Punë Sociale (QPS) ka bërë të ditur për 2L ONLINE, se shqetësuese janë rastet e të miturve në konflikt me ligjin, dhe përgjatë këtyre muajve të këtij viti, deri në ditën e sotme, kemi 46 raste të regjistruara dhe të trajtuara nga Qendra në fjalë.

Sipas Zymberit ky fakt duhet të jetë një alarm për prindërit, ndërkohë që Qendra po e bënë punën e saj në mënyrën më të mirë të mundshme, duke bashkëpunuar me të gjitha organizmat, si me policinë, prokurorinë, gjykatat, OJQ-të e ndryshme, por në këtë segment ajo po punon dhe do të punojë me shkollat e me prindër, që kjo të evitohet në të ardhmen. Sipas tij, roli kyç duhet të jetë i prindërve, por duhet të kemi edhe Qendra këshillimi psiko-social për fëmijë.

Përndryshe, ai tha se ndër veprat në të cilat janë përfshihen këta të mitur, janë kryesisht vjedhjet, rrahjet, problemet në rrugë, e vepra të tjera të paligjshme.

Drejtori Zymberi ka përmendur edhe rastet e dhunës në familje që janë shënuar për këtë periudhë të këtij viti, në territorin e Komunës së Gjilanit, e ku sipas tij, janë regjistruar e trajtuar 19 raste të dhunës në familje.

Zymberi tha se shërbimet sociale kanë trajtuar 19 raste përgjatë kësaj periudhe të këtij viti dhe ndonëse është shqetësuese paraqitja e këtyre rasteve, shërbimet sociale pran Qendrës për Punë Sociale po e menaxhojnë mirë situatën.

Zymberi tha se në rastet më të shumta, është femra ajo e cila është viktimë e dhunës në familje, por nuk përjashtohen raste kur rasti paraqitet edhe nga burrat për dhunë të ushtruar ndaj tyre, sidomos të asaj psikologjike, ndërsa më e keqja dhe më shqetësuese janë edhe raste kur fëmijët janë viktimë e dhunës në familje, nga pakujdesia e prindërve, nga lënia pasdore e tyre prej prindërve, por se shërbimet përkatëse kanë marrë masa, duke i trajtuar të gjitha rastet.

Përndryshe, është kërkuar nga të gjithë, që të flasin hapur për dhunën në familje ku ajo ekziston, sepse ndryshe, heshtja e rasteve e pamundëson luftimin e kësaj dukurie negative në shoqëri./2L ONLINE/