Aktivistë të Vetëvendosjes i dërguan thëngjill Ministrit Blerand Stavilecit!

Sot aktivistët e Vetëvendosjes i dërguan thëngjill Ministrit të Zhvillimit Ekonomik, Blerand Stavilecit, për t’i treguar që Kosova ka kapacitete dhe potencial që ta zgjidhë vetë krizën e saj energjetike, thuhet në një komunikatë të Lëvizjes Vetëvnedosje.

Qeveria e Kosovës përmes marrëveshjes me “Contour Global” po i privatizon kapacitetet e reja prodhuese të energjisë elektrike. Ky privatizim po ndodh pas dështimit total që rrjedhoi nga privatizimi i KEDS-it, i cili rezultoi me ngritje të çmimeve të energjisë elektrike, përkeqësim të kushteve të punës për punëtorët si dhe mungesë totale e investimeve në sektorin e energjetikës.

Ndërtimi dhe pronësimi i termocentralit “Kosova e Re” nga një kompani private, do t’i rrisë çmimet e energjisë elektrike për mbi 50%. Kjo ngase profitet për “Contour Global” do të sigurohen duke rritur tarifat.

Qytetarët e Kosovës nuk kanë para që t’i japin një kompanie multi-milionëshe, që po e shfrytëzon kriminalizimin e politikanëve tanë, për të bërë marrëveshje të tilla – tejet të dëmshme për vendin tonë. Prandaj Lëvizja Vetëvendosje do të intensifikojë aksionet dhe protestat kundër kësaj marrëveshjeje kriminale, thuhet në fund të ksëaj komunikate.