Aksion për pastrimin e ambientit dhe mbjelljen e luleve

/2L ONLINE/ – Komuna e Gjilanit në bashkëpunim me kompaninë “Eco-Higjiena” kanë ndërmarrë sot një aksion për ta pastruar ambientin në territorin e Komunës. Në aktivitetet e sotme në qytet e fshatra ka marrë pjesë edhe kryesuesja e Kuvendit, Valentina Bunjaku Rexhepi, drejtori i Shërbimeve Publike, Sokol Haziri dhe zyrtarë komunal.

Fillimisht kryesuesja e Kuvendit Komunal, Valentina Bunjaku Rexhepi e shoqëruar edhe nga këshilltarë komunal të pozitës e opozitës kanë mbjellur lule para Zyrës së Kryetarit të Komunës.

“Ashtu siç e ka thënë kryetari Haziri, synim yni është në Gjilan është që të mbjellim një lule kokë banori dhe këtë po ia arrijmë, sikurse edhe për mirëmbajtjen e hapësirave të gjelbëruara, krijimin e hapësirave të reja gjelbëruese, dekorimet, pemët dhe drunjtë tjerë dekorativ”, tha me këtë rast kryesuesja Bunjaku Rexhepi.

Një aktivitet tjetër është shënuar sot në fshatin Dobërqan, ku është pastruar lumi i këtij fshati.

“Sot e kemi nisur pastrimin e lumit të këtij fshati, i cili ka shkaktuar mjaft dëme në kohën e vërshimeve. Rreth 500 metra është pastruar dhe do të vazhdojmë ta pastrojmë në tërësi. Tash e tutje lumi më nuk do të dalë nga shtratin dhe të vërshojë shtëpitë e qytetarëve siç ka ndodhur më herët”, ka thënë me këtë rast drejtori i Shërbimeve Publike, Sokol Haziri.

Ai ka bërë apel qytetarëve që të mos hedhin mbeturina dhe që të mos dëmtohet shtrati i këtij lumi. Aksioni i ndërmarrë i Komunës po vazhdon edhe në lokalitete e fshatra të tjera të Komunës së Gjilanit. /2L ONLINE/