Aksion pastrimi në rrugët e fshatit si dhe nënkalimin afër shkollës

Fadil Ademi, anëtar i Kuvendit Komunal të Gjilanit nga radhët e Lëvizjes Vetëvendosje ka thënë se këtë ditë vikendi e shfrytëzuan në mënyrën më të mirë të mundshme, pasi bashkë me disa banorë të Velekincës u angazhuan për ta pastruar rrugën kryesore të fshatit, rrugët “Naser Neziri” dhe “Hysen Jakupi”, si dhe nënkalimin afër shkollës.

“Nuk na u desh shumë kohë, por ndryshimi u pa menjëherë. Kjo dëshmon se kur ka vullnet dhe bashkëpunim, çdo gjë bëhet më lehtë”, ka thënë Ademi.

Ai bëri me dije se të gjitha mbeturinat që i grumbulluan i dorëzuan në deponinë e Velekincës, e cila tashmë është e hapur çdo të shtunë për pranimin e mbeturinave nga qytetarët. “Le ta shfrytëzojmë këtë mundësi dhe t’i hedhim mbeturinat aty ku e kanë vendin”, ka thënë kuvendari i Gjilanit, Fadil Ademi.

“Shpresoj që ky veprim i vogël të shërbejë si një mesazh për të gjithë ne. Velekinca është shtëpia jonë e përbashkët dhe pastërtia e saj është përgjegjësi e secilit. Ta duam vendin tonë jo vetëm me fjalë, por edhe me vepra”, ka thënë Fadil Ademi, anëtar i Kuvendit Komunal të Gjilanit nga radhët e Lëvizjes Vetëvendosje.  /2LONLINE/