Ahmet Isufi: Rinia, bartëse e proceseve më të rëndësishme për vendin

Ahmet Isufi nga Aleanca ka thënë se rinia si shtresa më vitale e Kosovës ka nevojë për perspektivë në vendin e saj, aty ku i përket, aty ku ka peshë. Rinia duhet të vendoset në qendër të politikave shtetërore.

Isufi thotë se sot, sfida më e madhe e Kosovës nuk është mungesa e potencialit, por largimi i njerëzve më të aftë nga vendi. Kjo duhet të na alarmojë secilin. Një shtet që nuk arrin t’ia ruaj rininë vetes, rrezikon të humb të ardhmen e vet. Kosova duke u marrë me tema periferike dhe pa relevancë, po e rrezikon të ardhmen e saj.

“Në secilën rrethanë historike, rinia ishte ajo që ka pri dhe e ka bë ndryshimin. Mobilizimi i rinisë e solli lirinë. Rinia e krijoj dhe e ndërtoi shtetin. Ajo e siguron edhe të ardhmen.  Të rinjtë tanë kërkojnë drejtësi, arsim cilësor, mundësi të barabarta, punësim dinjitoz dhe një shtet ku vlen dija e puna, e jo lidhja dhe servilizmi politik”, ka thënë tutje Ahmet Isufi i Aleancës.

Sipas tij, Kosova nuk ndërtohet duke i mbajt të rinjtë peng të premtimeve boshe. Ndërtohet duke ua krijuar kushtet që talentin, energjinë dhe dijen e tyre ta investojnë këtu, në vendin e vet.

“Një qeveri që nuk e ka prioritet rininë, nuk e ka prioritet as shtetin, nuk sheh kah e ardhmja dhe nuk kujdeset për brezat. Rinia nuk është vetëm pjesë e Kosovës së nesërme, është themeli mbi të cilin mbahet Kosova sot”, thotë Ahmet isufi i Aleancës i cili në zgjedhjet e parakohshme të 7 Qershorit do të garojë për deputet të Kuvendit të Kosovës.  /2LONLINE/