Ahmet Isufi: Me krenari kam bartur nofkën “Rexha”

“Me miq të nderuar në familjen e Heroit të Kombit, Rexhep Mala. Në një ndejë të organizuar me shumë kujdes e respekt, Hasan Mala (Plaku) me familje, na priti në shtëpinë që u bë vatër frymëzimi, për ilegalën e luftën për liri. Me biseda nga e kaluara e lavdishme e një gjenerate që mbolli frymën e lirisë e deri te lufta e Ushtrisë Çlirimtare të Kosovës ku u rreshtuan bijat e bijtë më të mirë të popullit, u çmallëm duke spikatur momente të rëndësishme nga ato ditë të vështira por shumë kuptimplote për fatin e atdheut”,  ka thënë Ahmet Isufi, Ish-komandanti i Ushtrisë Çlirimtare të Kosovës për Zonën Operative të Karadakut.

Ai shtoi se jehona e krismave të Rexhep Malës e Nuhi Berishës në Kodrën e Trimave (Vranjevc) u shtua nga rreshti i gjatë i luftëtarëve të lirisë për të marrë hak e për ta quar amanetin në vend, për ta çliruar Kosovën.

“Vazhdimësia e idealit ndër breza ndikoi që Brigada e parë 171 e ZOK-ut të marrë emrin e ideologut më të madh të lëvizjes kombëtare Kadri Zeka dhe si imazh i komandantit të luftës për liri, me krenari kam bartur nofkën “Rexha””, ka thënë  ish komandanti i UÇK-së, Ahmet Isufi, transmeton 2LONLINE.

Ai tha se vizioni i Rexhep Malës për luftën e armatosur u shndërrua në mision për ne, prandaj morën vendim që Shtabi i Zonës Operative të Karadakut të vendosej përkohësisht e simbolikisht në shtëpinë e tij.

“Këtë ndejë e bëri edhe më madhështore, prezenca e shokëve e miqve të shtëpisë dhe e bashkëveprimtarit e liderit të shqiptarëve të Maqedonisë së Veriut, Ali Ahmeti i cili në shenjë nderimi i dhuroi Plakut, porterin e Heroit Rexhep Mala si kujtim për gjithë kontributin e angazhimin për çlirimin e atdheut”, ka thënën tutje Isufi, transmeton 2LONLINE.

Ai bëri me dije se me këtë rast, në shenjë respekti familjes Malaj i dhuruan flamurin kombëtar dhe të UÇK-së, si përkujtim të ndikimit të fuqishëm që kishte krijuar me qëndrimin e tij Rexhep Mala te gjenerata më e re e organizuar nga Heroi Nuhi Berisha, e që bashkë ranë për të paralajmëruar vazhdimin e luftës së armatosur të Ushtrisë Çlirimtare të Kosovës.

“Në fund u përshëndetëm ngrohtësisht nga familja e madhe Malaj mes emocionesh, kujtimesh dhe nderimi për një të kaluar shumë të lavdishme e për një të ardhme më të ndritur për popullin tonë. Lavdi e përjetshme Heroit të Kombit Rexhep Malaj. Faleminderit për mikpritjen, familje Mala”, ka thënë Ahmet Isufi, Ish-komandanti i Ushtrisë Çlirimtare të Kosovës për Zonën Operative të Karadakut.  /2LONLINE/