Ahmet Isufi: “Kujdesi ndaj familjeve të dëshmorëve, invalidëve dhe veteranëve mbetet përgjegjësi e jona”

Në Ditën e Çlirimit të Gjilanit është nënshkruar një marrëveshje bashkëpunimi mes Dr. Agron Lekës dhe përfaqësuesve të shoqatave të dala nga lufta, me qëllim ofrimin e kontrolleve mjekësore falas për familjet e dëshmorëve, invalidët dhe veteranët e luftës, transmeton 2LONLINE.

Në ceremoninë e nënshkrimit mori pjesë edhe ish-komandanti i UÇK-së në Zonën Operative të Karadakut, Ahmet Isufi, i cili e vlerësoi këtë marrëveshje si një hap të rëndësishëm në mbështetje të kategorive të dala nga lufta.

“Nënshkrimi i kësaj marrëveshjeje, pikërisht në Ditën e Çlirimit, është simbolikë e veçantë, sepse dëshmon përkushtimin tonë që vlerat e luftës dhe kujdesi ndaj familjeve të dëshmorëve, invalidëve dhe veteranëve të mbeten përgjegjësi e jona”, ka deklaruar Isufi, transmeton 2LONLINE.

Marrëveshja është nënshkruar ndërmjet Dr. Agron Lekës dhe kryetarëve të Shoqatës së Invalidëve të Luftës, Selver Kçiku, Organizatës së Veteranëve të Luftës së UÇK-së, Xhevdet Mehmeti, si dhe Shoqatës së Familjeve të Dëshmorëve, Rashit Ymeri.

Isufi ka shprehur mirënjohje të veçantë për Dr. Lekën për gatishmërinë dhe mbështetjen e vazhdueshme ndaj kategorive të dala nga lufta, duke theksuar rëndësinë e solidaritetit dhe kujdesit institucional për ata që kanë kontribuar për lirinë e vendit. /2LONLINE/