Ahmet Isufi: Investimet në Anamoravë janë interes strategjik

“Sot, bashkë me kolegët kandidatë për deputetë dhe struktura të Aleancës, pritëm Kryetarin dhe kandidatin për Kryeministër, Ardian Gjini me të cilin rast e njoftuam për angazhimet dinamike në takime me qytetarë dhe interesimin për realizimin e objektivave tona për zhvillimin e Gjilanit”. Ka thënë Ahmet Isufi nga Aleanca, që në zgjedhjet e 7 Qershorit do të garoj për pozitën e deputetit.

Ai ka bërë me dije se gjithashtu vizituan disa ndërmarrje, për të parë nga afër potencialin ekonomik dhe për të dëgjuar zërin e sipërmarrësve.

“Një vizitë me shumë interes realizuam në fabrikën e mobiljeve ,,Palma”, ku u njoftuam për të arriturat dhe zhvillimin e saj si një shembull i shkëlqyer i ndërmarrësisë, për të vazhduar te kompania për prodhimin e mobilieve ,,Euro Model’’, ka thënë Isufi.

Siç bëri me dije ai, për tu njohur me të kaluarën e afërt të lavdishme vizituan “Kullën e Bashkimit’’ në Kosaqë, aty ku është e pasqyruar historia e tri luftërave çlirimtare dhe aty ku përvjetorët e festat kombëtare na bashkojnë nga të gjitha viset shqiptare.

“Në Dardanë, vizituam fabrikën e ujit “Qua Fix” për të treguar interesimin dhe mbështetjen tonë për prodhuesit vendorë. Këtë vizitë e përmbyllëm me një bashkëbisedim me rininë e cila është e mrekullueshme, por ka nevojë për përkrahje e hapje të perspektivës”, ka thënë tutje Ahmet Isufi i Aleancës.

Ai shtoi se me përkushtim të përbashkët do ti kthehen angazhimit institucional, për të vazhduar investimet e mbetura në Anamoravë sidomos kur kemi parasysh interesin strategjik si zonë kufitare, ku është lidhja e domosdoshme me bashkëkombasit tanë në Kosovën Lindore.  /2LONLINE/