Ahmet Isufi: Gjilani meriton trajtim dinjitoz nga pushteti qendror dhe përfaqësim serioz në Kuvendin e Kosovës

Ahmet Isufi, kandidati i Aleancës në garën për deputet të Kuvendit të Kosovës, në zgjedhjet e parakohshme të 7 Qershorit, ka thënë se është e pafalshme që një komunë si Gjilani të mbetet zonë e pazhvilluar dhe në prag të mjerimit. Ai tha se Gjilani meriton trajtim dinjitoz nga pushteti qendror dhe përfaqësim serioz në Kuvendin e Kosovës, por fatkeqësisht, kjo i ka munguar për vite me radhë.

Isufi tha se deputetët mbajnë përgjegjësi për atë që i ofrohet komunave prej nga vijnë. Pikërisht për këtë quhen përfaqësues. Deputeti i Gjilanit e ka obligim moral dhe politik që fillimisht t’i adresojë problemet e qytetit të vet, para se të merret me tema të tjera.

“Si Aleancë, kemi dëshmuar se komunat i trajtojmë njësoj, pa na interesuar kush qeveris me to. Komunat janë të Kosovës dhe si të tilla duhet të trajtohen nga qeveria. Gjilani, me qeverisjen e Gjinit dhe me përfaqësim serioz në Kuvend, do të rikthehet në hartën e investimeve kapitale, ashtu siç ishte në kohën e qeverisë Haradinaj. Qytetarët tashmë e kanë parë shkollën politike të Aleancës në komunat ku qeveris. Këta jemi”, është shprehur Ahmet Isufi i Aleancës.

Ai shtoi se Gjilani i atdhetarëve dhe intelektualëve të zotë meriton dinjitet, zhvillim dhe respekt. /2LONLINE/