Ahmet Isufi: Dinjiteti i ushtarit është dinjiteti i vet shtetit!

“E papranueshme kur një ushtar i Kosovës, njeriu që ka marrë përsipër ta mbrojë këtë vend me jetë, detyrohet të heq uniformën në mbrëmje dhe ti veshë rrobat e një pune të dytë, vetëm për ta mbajt familjen. Ky është alarm moral për shtetin”, ka thënë Ahmet isufi nga Aleanca për Ardhmërinë e Kosovës (AAK).

Sipas tij, një shtet që pret sakrificë, disiplinë dhe gatishmëri absolute nga ushtari i vet, nuk guxon ta lë atë të përballet çdo ditë me frikën e faturave, të qirasë apo të bukës për fëmijët.

Ushtria nuk forcohet vetëm me armë e deklarata patriotike. Forcohet kur ushtari ndjehet i respektuar, i mbrojtur dhe i vlerësuar në jetën reale.

“Sot flasim për siguri kombëtare, për ushtri moderne e për anëtarësim në NATO, por harrojmë një të vërtetë themelore. Nuk mund ta ndërtosh një ushtri dinjitoze mbi shpinën e një ushtari që lodhet dyfish për të mbijetuar. Ai të cilit i është besuar siguria e Kosovës nuk duhet të detyrohet të luftojë edhe për mbijetesën e familjes së vet”, ka thënë tutje, Isufi.

Sipas tij, kjo temë kërkon angazhim dhe veprim konkret nga shteti. Kërkon ndërgjegje.

“Dinjiteti i ushtarit është dinjiteti i shtetit vet. Ushtari që krejt fokusin e ka tek puna e sigurisë pa e çu mendjen se si t’ia sigurojë familjes bukën, barnat e një jetë normale, nënkupton shtetin e fortë dhe të përgjegjshëm”, ka thënë Ahmet Isufi i AAK-së. ish komandant i Ushtrisë Çlirimtare të Kosovës për Zonën Operative të Karadakut.  /2LONLINE/