Agjencia e Kosovës për Akreditim ka ri-akredituar shtatë programe studimi të Universitetit të Gjilanit

/2L ONLINE/ – Agjencia e Kosovës për Akreditim (AKA) gjatë vitit 2016 ka bërë vlerësimin e institucioneve publike dhe private të arsimit të lartë në Kosovë. AKA ka pranuar aplikacionin edhe nga Universiteti “ Kadri Zeka” për ri/akreditimin e 7 programeve të studimit në nivelin BA. Kështu në bazë të rekomandimeve të ekspertëve ndërkombëtarë të akreditimit, dhe në bazë të Ligjit mbi Arsimin e Lartë dhe Udhëzimit Administrativ për Akreditimin e IAL-ve në Kosovë, Këshilli Shtetëror i Cilësisë (KSHC) në mbledhjen e mbajtur me 6 Korrik 2016 ka marrë vendim dhe ka akredituar 7 programe të studimit të Universitetit “Kadri Zeka” për periudhën 3 vjeçare , 1/10/2016 – 31/9/2019.

Për Fakultetin e Edukimit janë akredituar programet e studimit: Arsimi Fillor/BA; Arsimi Parashkollor/BA , në Fakultetin Ekonomik janë akredituar programet: Banka, Financa dhe Kontabilitet/BA; Marketing/BA dhe Menaxhment e Informatikë BA, programet e studimit në Fakultetin Juridik/BA dhe në Fakultetin Shkenca Kompjuterike/BA.

Agjencia e Kosovës për Akreditim ne Universitetin “Kadri Zeka” ka realizuar procesin e vlerësimit dhe ri/akreditimit me ekspertë ndërkombëtarë të akreditimit përgjatë muajve Prill, Maj dhe Qershor 2016. /2L ONLINE/