Në KRU “Hidromorava” SH.A – Gjilan është mbajtur takimi i rëndësishëm me përfaqësues të nivelit qendror dhe të përfaqësuesve lokal, për të adresuar çështjet thelbësore që lidhen me furnizimin e ujit të pijshëm dhe infrastrukturën e rrjetit të ujësjellësit, njofton Kompania Hidromorava.
Kryeshefi Ekzekutiv i Kompanisë së Ujësjellësit, Ymer Salihu, ka pritur në takim këshilltaren politike për Ndërmarrjet Publike, Merita Osmani Ejupi, udhëheqësin e Njësisë për Monitorimin e Ndërmarrjeve Publike, Valon Prebreza, si dhe Bordin të KRU Hidromorava, së bashku me Kryetarët e Komunave në Anamoravë, të cilët drejtojnë komunat që Kompania Hidromorava i menaxhon dhe operon sistemet e ujit dhe kanalizimit.
Qëllimi kryesor i këtij takimi ishte të ndaheshin shqetësimet dhe synimet për të thelluar bashkëpunimin ndërmjet komunave dhe Kompanisë së Ujësjellësit. Ky takim ishte një hap i rëndësishëm drejt thellimit të marrëdhënieve të mira dhe bashkëpunimit të qëndrueshëm ndërmjet Komunave dhe Kompanisë së Ujësjellësit.
Kryesuesi i Bordit të Ujësjellësve, Habil Zeqiri, në emër të anëtarëve të bordit pasi bëri një përshëndetje të ngrohtë të pranishmëve, shprehu bindjen e tij se përmes bashkëpunimit dhe dialogut të vazhdueshëm, do të jemi në gjendje të përmirësojmë cilësinë e furnizimit të ujit, të menaxhojmë burimet e ujit me efikasitet, dhe të zhvillojmë dhe modernizojmë infrastrukturën e rrjetit të ujësjellësit në mënyrë që të përmbushim nevojat e konsumatorëve.
Në këtë kontekst, kryeshefi ekzekutiv i Hidromoravës, Ymer Salihu, prezantoi projektet që planifikohen të zhvillohen gjatë vitit 2023 dhe 2024. “Këto projekte përfshijnë përmirësimin e infrastrukturës së ujësjellësit dhe kanalizimeve, si dhe zgjerimin e rrjetit të ujësjellësit në zonat ku mungon furnizimi aktualisht. Synimi kryesor është të sigurohet që të gjithë qytetarët të kenë mundësi të qasen në ujë të pijshëm, pavarësisht nga vendndodhja e tyre”, ka thënë ai.
Salihu theksoi se ne si Kompania e Ujësjellësit, janë të përgjegjshëm dhe të përkushtuar ndaj këtyre qëllimeve të rëndësishme. ‘Bashkë me autoritetet vendore jemi të vendosur të bëjmë ndryshime të mëdha pozitive në jetën tonë dhe të gjithë qytetarëve tanë. Kjo është një sfidë e madhe, por jemi të përgatitur për të ndërmarrë këtë mision dhe për të bërë ndryshimin që duhet”, ka thënë kryeshefi ekzekutiv i Hidromoravës.
Në fund, ai falënderoi të gjithë të pranishmit për angazhimin dhe bashkëpunimin e vazhdueshëm në këtë mision të rëndësishëm për shëndetin dhe mirëqenien tonë dhe e të gjithë qytetarëve. “Bashkë, mundemi të bëjmë ndryshime të mëdha dhe të kemi një ndikim pozitiv në jetën e qytetarëve tonë”. /2LONLINE/
