AAK e NISMA me marreveshje për koalicion parazgjedhor

Kryetari i AAK-së Ramush Haradinaj dhe ai i NISMA-s, Fatmir Limaj kanë nënshkruar marrëveshjen për koalicion parazgjedhor. Me këtë rast Limaj ka ftuar edhe partite e tjera që t’ju bashkohen kësaj marrëveshje.

”Në mënyrë të përgjegjshme AAK dhe NISMA kanë ndërtuar marrëveshjen e koalicionit parazgjedhor, duke ftuar edhe tjerët që të na bashkohen’’, ka thënë Limaj.

Ndërsa kreu i AAK-së, Ramush Haradinaj u ka bërë thirrje partive e shoqërisë civile që së bashku të ndryshojnë gjendjen në vend.

Marrëveshja:

Duke u nisur nga bashkëpunimi i deritashëm opozitar;
Duke pasur parasysh gjendjen e krijuar në vend pas nënshkrimit të dy marrëveshjeve të dëmshme dhe degradimin e plotë të qeverisjes, rrënimin e sundimit të ligjit dhe humbjen e shpresës për zhvillim ekonomik;

Duke pasur parasysh nevojën për ndërtim të një opsioni real qeverisës, që garanton qeverisje demokratike, sundim të ligjit, zhvillim të qëndrueshëm ekonomik dhe perspektivë të palëkundur euro-atlantike për Kosovën;

Aleanca për Ardhmërinë e Kosovës dhe Nisma për Kosovën lidhin marrëveshje bashkëpunimin opozitar dhe dakordohen me sa vijon:

– Që në zgjedhjet e ardhshme të shkojnë me një koalicion te përbashkët,

– Që të mbeten të hapura për koalicion parazgjedhor edhe për forcat e tjera politike, me përjashtim të partive që aktualisht janë në pushtet (PDK – LDK),

– Që të mbeten të hapur për kandidatura tjera nga Shoqëria Civile, apo personalitete publike.

Aleanca për Ardhmërinë e Kosovës dhe Nisma për Kosovën, poashtu dakordohen që ta vazhdojnë kundërshtimin opozitar ndaj kapjes së shtetit dhe keqqeverisjes që ka kulmuar me dy marrëveshjet kundërkushtetuese, deri në anulimin e tyre dhe në shkarkimin e Qeverisë dhe shpalljen e zgjedhjeve të reja.