Përurohen investimet në Klinikën Emergjente

Kryeministri i Republikës së Kosovës, Albin Kurti, Ministri i Shëndetësisë, dr. Arben Vitia, dhe deputeti i Kuvendit të Republikës së Kosovës, Haxhi Avdyli, të shoqëruar nga Drejtori i ShSKUK-së, Elvir Azizi, Drejtori i QKUK-së, Osman Hajdari morën pjesë në përurimin e renovimeve të Klinikës Emergjente në QKUK.

Investimet prej 800 mijë euro në Klinikën Emergjente sjellin përmirësime të dukshme për pacientët dhe lehtësojnë punën e stafit shëndetësor, thuhet në komunikatën e Ministrisë së Shëndetësisë.

Pas finalizimit të këtyre investimeve, Kryeministri Kurti theksoi se Klinika Emergjente ka pësuar një transformim të jashtëzakonshëm, duke përfshirë hapësirë për triazhim, klimatizim dhe ventilim qëndror, rritjen e kapaciteteve me shtretër të rinj, riorganizimin e tërsishëm të hapësirave të brendshme, banjo dhe nyje sanitare që përmbushin standardët më të larta të higjenës dhe integrimin e telemjekësisë për monitorim të operacioneve në kohë reale.

Ndërsa, Ministri i Shëndetësisë, dr. Arben Vitia, tha se investimet e tilla dhe procese të tjera janë duke vazhduar në QKUK, si edhe në spitalet regjionale.

Ministri Vitia falënderoi të gjithë profesionistët shëndetësorë dhe theksoi se ky rezultat sot është meritë e kërkesave dhe punës së tyre.

Ministria e Shëndetësisë mbetet e përkushtuar për të siguruar kushte sa më të mira për qytetarët në shëndetësinë publike, thuhet në njoftimi ne MSH-së.  /2LONLINE/