40 milionë euro për ta rrëzuar figurën e Ibrahim Rugovës si lider?!

Astrit Haraqija ka thënë se posedon dokumente që dëshmojnë se Qeveria në Ekzil e Bujar Bukoshit me Isa Mustafën – ministër të Financave, i ka dhënë 40 milionë euro Lëvizjes Popullore të Kosovës (LPK) për ta rrëzuar figurën e Ibrahim Rugovës si lider. Këto shuma janë dhënë, siç ka thënë Haraqija, brenda periudhës kohore 1994-2000.

Ai ka thënë se dokumentet do t’i botojë brenda 3 ditëve.

“Fjala është për Fondin 3%”, ka thënë ai.

Haraqija është i bindur se SHIK-u po e ndihmon Isa Mustafën. “Isa Mustafa i ka shti familjet e mëdha në Gjakove me u përça. Njerëzit nuk po i shkojnë njëri-tjetrit nëpër dasma, e as nuk po takohen me njëri-tjetrin, nga droja se mos identifikohen me Astrit Haraqinë e jo me Isa Mustafën”, ka thënë Haraqija në emisionin “Rrokum Roll” në televizionin “Rrokum”.

Haraqija ka thënë se e kanë telefonuar anëtarë të Kryesisë qendrore të LDK-së, duke i thënë se nuk munden të takohen me të pa u kryer zgjedhjet e brendshme në parti. “Isa Mustafa po bënë shantazh e presion te anëtarësia dhe të degët e partisë, për t’i fituar vetë zgjedhjet”, ka thënë Haraqija.
Sipas Haraqisë, shumica e degëve të LDK-së në Kosovë nuk janë me Isa Mustafën.

Haraqija ka shtuar se në LDK nuk ka më frymë rugoviane, por frymë të Isa Mustafes – frymë komuniste.

Ai ka thënë se Isa Mustafa i ka kthyer tri humbjet e tij në fitore. “Vetëm serbët bëjnë kështu”, ka deklaruar Haraqija.

Ai e ka përjashtuar Mustafën nga mundësia për t’u rizgjedhur kryetar i LDK-së. Sipas tij, drejtimin e LDK-së mundet ta marrë edhe Sabri Hamiti, Agim Veliu apo Lutfi Haziri, por jo Isa Mustafa. (Epokaere)