39 të dënuar certifikohen pas përfundimit të programit “Menaxhimi i Zemërimit”

Në Qendrën Korrektuese në Dubravë është përmbyllur me sukses programi “Menaxhimi i Zemërimit”, në kuadër të të cilit 39 të dënuar u certifikuan pas përfundimit të tij.

Programi është realizuar nga Zyrtarët për Zbatimin e Programeve Risocializuese, Suzana Gusturanaj dhe Labinot Myrtaj, me fokus në zhvillimin e aftësive të të dënuarve për menaxhimin e emocioneve dhe kontrollimin e reagimeve në situata të ndryshme.

Gjatë zhvillimit të programit, pjesëmarrësit kanë punuar në njohjen dhe menaxhimin e impulseve, kontrollimin e zemërimit, si dhe në përmirësimin e mënyrës së të menduarit dhe sjelljes.

Qëllimi i këtyre aktiviteteve është që të dënuarit të zhvillojnë forma më konstruktive të komunikimit dhe reagimit në raport me të tjerët, të marrin përgjegjësi për veprimet e tyre dhe të krijojnë mundësi më të mira për risocializim dhe riintegrim në shoqëri. Në ceremoninë e certifikimit morën pjesë U.D. Drejtori i Qendrës Korrektuese në Dubravë, Arsim Sherifi, si dhe zyrtarë të tjerë të institucionit.

Gjatë ceremonisë, drejtuesit e institucionit vlerësuan rëndësinë e programeve risocializuese dhe kontributin e tyre në krijimin e një ambienti më të sigurt brenda qendrës. Sipas tyre, këto programe ndikojnë në zhvillimin personal dhe social të të dënuarve, në uljen e incidenteve dhe, në përgjithësi, në parandalimin e përsëritjes së veprave penale.

Programet e risocializimit janë pjesë e rëndësishme e procesit të përgatitjes së të dënuarve për kthimin në shoqëri, duke synuar një riintegrim sa më të suksesshëm pas përfundimit të mbajtjes së dënimit.  /2LONLINE/