Gjilani dhuron autoambulancë dhe pajisje mjekësore për Novobërdën
Komuna e Gjilanit do të dhurojë një autoambulancë dhe pajisje të tjera mjekësore për Komunën e Novobërdës, me qëllim përmirësimin e shërbimeve shëndetësore për qytetarët e kësaj komune.
Për këtë qëllim, kryetari i Komunës së Gjilanit, Alban Hyseni, ka nënshkruar marrëveshje me nënkryetarin e Komunës së Novobërdës, Abdyl Gashi, për realizimin e këtij donacioni.
Kryetari Hyseni tha se mbështetja synon të ndikojë drejtpërdrejt në ofrimin e shërbimeve shëndetësore për banorët e Novobërdës.
“Ky donacion do të ndihmojë drejtpërdrejt në ofrimin dhe përmirësimin e shërbimeve shëndetësore për të gjithë qytetarët e Novobërdës”, ka deklaruar Hyseni.
Ai theksoi gjithashtu rëndësinë e bashkëpunimit ndërmjet dy komunave.
“Bashkëpunimi dhe partneriteti ndërmjet komunave tona mbetet shtyllë e rëndësishme për zhvillimin e rajonit dhe mirëqenien e banorëve tanë”, ka thënë kryetari i Gjilanit. /2LONLINE/