Biznesmenë nga Gjermania dhe përfaqësues të institucioneve të Kosovës janë bashkuar në Frankfurt dhe Këln të Gjermanisë, për të krijuar rrjetin e bashkëpunimit të bizneseve gjermano-kosovare. Përfaqësuesit e institucioneve kosovare edhe në këtë takim, i kanë bërë thirrje diasporës që të investojë në Kosovë.
Në këto takime që po mbahen në Gjermani, po marrin pjesë përfaqësues nga Ministria e Diasporës, Ministria e Zhvillimit Ekonomik, Oda Ekonomike Amerikane, UNDP-ja, IOM-i si dhe përfaqësues të bizneseve të diasporës në Gjermani.
Në Frankfurt u mbajt takimi i parë me bizneset e diasporës, ku ishin të pranishëm një numër i madh i bizneseve te këtij qyteti dhe atyre nga Shtutgardi.
Pas fjalëve përshëndetëse të përfaqësuese të institucioneve nga Kosova dhe atyre ndërkombëtare, foli Valon Aliu, pronar i kompanisë VA-TEC nga Shtutgardi i cili përveç biznesit që e udhëheq në Gjermani kishte investuar edhe në Kosovë.
Aliu tregoi shembullin konkret të investimeve të tij, sfidat dhe sukseset që ka pasur deri tani. “U bëj thirrje të gjithë atyre që kanë pak mundësi të investojnë në Kosovë”, tha Aliu, thuhet në njoftimin e MeD.
Fillimisht mysafirët nga Kosova vizituan ordinancën “Zahnarztpraxis” me pronar Dr.Naim Osmani, i cili kishte të punësuar mbi 10 punëtorë. Pastaj iu bë vizitë kompanisë “Awr-Abbruch GmbH” pronare të së cilës ishin tre vëllezërit Viqa nga Ferizaj.
Nazmi Viqa, menaxher i kompanisë, tregoi historikun e kësaj kompanie e cila ishte ndër kompanitë më të mëdha në Gjermani e cila merret me shkatërrimin e objekteve të mëdha. Në fund të ditës vizituam Agjencinë turistik “Eurokoha”, “Albakos” dhe “Loni-Reisen”.
Në këtë konferencë merr pjesë Ministri i Diasporës, Ibrahim Makolli, ndërsa qëllimi i konferencës, siç thuhet në njoftim, është krijimi i rrjetit të bizneseve të diasporës në Gjermani./albinfo.ch/
